啱啱考完試，但係challenge係未完㗎，唔少大學嘅program開始叫人interview。你以為拎住5**就一定無死？傻豬豬，成績固之然重要，interview都唔可以忽視丫，話俾你心宜嘅大學知：我唔係高分低能！(講呢啲~)
喺呢個stage，唔少人都無乜interview經驗，以下係非官方統計超過七成DSE人都會喺in U時犯嘅錯，睇下你有冇中。
一、衣著不符
小心界定咩叫smart casual！！如果寫business attire大家都會知道要full suit，但係如果個invitation寫smart casual，唔知點著好嘅話就記住呢五個字：禮多人不怪。
golden rule for every occasion: 著得太隆重總好過太求其
得體嘅衣著係基本禮貌，著牛記去interview/present/見大人物，你估自己係Steve Jobs咩。
如果寫到明smart casual，男仔可以著裇衫加西褲，只要顏色唔好鬼五馬六都唔會出事，一對靚既皮鞋動輒幾千，呢個年紀無彈藥買人之常情，但係寧願著番學嗰對黑色皮鞋都切忌著CON屎去！見過唔少小朋友即使著衫無大問題，不過衰左喺個袋到—西裝襯個Ｎ記背囊，真係ＯＭＧ…真係無袋用咪鬼拎袋囉，用個LOG ON買嗰啲公文袋入住啲CV，男仔不嬲出街都好少拎袋架啦；
女仔更加簡單，深色裙加對深色矮踭鞋，大部分既場合都已經可以駕御到，記住條裙要遮到過半大脾，marginal長度配埋實色黑絲就穩［］啲。妝可以唔化，要記住你宜家去in大學，in你既人係Professer/lecturer，學術形既叔叔姨姨點會睇你靚唔靚。你既身份係學生，佢地對你外表既要求只係整潔得體，相反，太濃妝艶抺、成身名牌卻會惹佢地反感。
All in all，男仔女仔都好，唔知著乜既話suit up包無錯，但係如果驚得你一個著full suit俾人當weirdo (其實喺interviewer眼中你一啲都唔weird)，你可以考慮著住smart casual裇衫西褲，再帶埋tie同西裝褸，去到如果個個都full suit先走去廁所打番條tie，凡事有兩手準備，自信都多啲。
二、背答案
Interview要準備充足，但係唔好死背書。自我介紹(可參閱自我介紹extended entry)、優/缺點都係大熱問題，同學仔都應該一早預備好晒個答案，但係切忌word by word咁背番出泥。試下將想講既內容以point form咁列出泥而唔係寫晒成篇script，再睇住呢份notes用口語串連練多幾次，背熟左啲point，就能夠自然而流暢咁喺interview講得番出泥。
要記住，作為interviewer，佢地想了解你多啲，背書俾佢聽無意思之餘仲會覺得你好假。
三、即食麵式preparation
只求快不求準，十次唔同既interview但淨係做一種preparation，稱為「即食麵式preparation」。即使你全部都揀晒工商管理，你去唔同大學都要講得出點解你揀中大唔揀科大架(但事實上你8間U都有揀工管)。一式一樣既答案肯定唔能夠好accurate咁講得出你同間U既嗰一科有幾match，講唔出代表咩？你無誠意囉！
四、Gestures有問題
無論考oral定group interview，形形式式嘅奇怪gestures我都見過，超過九成機會你起碼中左其中一樣：
坐姿太hea或太鬼鼠— 背脊唔好貼住個椅背，挺直腰坐三分二張櫈；好多人都唔知交叉腳亦係壞習慣，你以為好斯文？其實錯晒！呢個動作睇落去好串，俾人一種唔可以親近既感覺。男仔應該雙腳微微分開，兩隻腳都要腳踏實地，俾人一種沉實既impression；女仔合埋腳向一個方向傾斜，斯文又大方。
緊張— 周身旭、un腳、撥頭髮、mun衫袖、不停換左右交叉雙腳…太多動作顯示你對環境感到好緊張。仲有講英文／普通話時特別細聲、抖大氣、無眼神接觸、答案過短等都係缺乏自信既癥狀。其實interview無可避免會緊張，話晒嗰半個鐘有可能影響你未來嗰幾年要走既路，甚至係你一生前途。老生常談，練多啲自然無咁驚，特別係外語一環，放假輕鬆既時候煲下美劇、台劇，聽多啲oral都會有進步架。
五、面試完左未？
唔好以為你既答案先會俾人evaluate，當面試差唔多完結(差唔多即係未完結)既時候，通常interviewer都會問你有無問題想問番佢地，呢段時間亦會係佢地evaluate既一環。想知多啲顯出你有誠意泥呢到讀，所以打死都要準備定2-3個有質素既問題，例如「根據我既了解，呢科喺Year 2既時候會揀concentration area，我想問下可唔可以take兩個或以上既concentration？」一啲你喺佢公開既資料裡面揾唔到既野先好問，唔好問啲白痴野，例如「今年你諗住收幾多人？」呢啲真心(膠)問題。當然，你都要把握同可能將來教你既人問清楚，睇下呢間大學、呢一科係咪真係適合你，話晒佢有權決定收唔收你既同時你都有權決定入唔入去讀書。
********小小BONUS 分享************
當你完左INTERVIEW之後 / 開始之前，你睇下有冇辦法令到個INTERVIEWER既EMAIL ADDRESS。如果冇既你就要記得佢姓咩名咩，IN完自己用電話上返大學個網度CHECK返佢EMAIL ADDRESS。要來做咩? SEND返個THANK YOU EMAIL俾人囉。如果佢有答到你野或者做左D SHARING既，你就多謝佢既INSPIRATION點點點。如果冇交流，純粹多謝人地俾INTERVIEW機會你。
我知道好多朋友仔都會覺得咁做好ODD好唔好意思，但都係THROUGH EMAIL姐，唔洗錢打幾粒字識返個朋友，又唔係直接見面。PROFESSOR唔會覺得ODD。INTERVIEW呢家野，一切都係印象使然 =]
*******************************************************
有咩問題歡迎留言，祝你好運！
沒有留言:
張貼留言